قصه روووووووعه لاتفوتكم ..

محمد:ألو..
ناصر:نعم..
محمد:أبشرك,أبشرك...
ناصر:بأيش..؟؟
محمد:سارة جابت لك بنوتة ألف ألف مبروووووك..
ناصر:الله يبارك فيك,متى؟؟ "ببرود"
محمد:اليوم الفجرمالها إلا ساعتين طالعة من غرفة الولادة..
******************************************
" في المستشفى"
------------------------------------
ناصر: السلام عليكم..
سارة :وعليكم السلام..أهلين..
ناصر:الحمد لله على سلامتك.. " من غير نفس "
سارة:الله يسلمك ....
ناصر:وين البنية؟إن شاء الله بخير؟؟....
سارة :الحمد لله تمام بس .....
ناصر:بس أيش؟؟؟؟.. ((من غير نفس))
سارة:أيش رايك نسميها "غدي"؟؟؟
ناصر:لا ما أبغى نسميها غدي وبعدين معاك من يوم حملتي"غدي،غدي"قلت الأسامي..
سارة:ناصر وش فيك عصبت الموضوع ما يستاهل!!!
ناصر:أقول عاد..أسمعي ما ودي أقولك شي لإني مالي خلق مخلي دوامي علشان أجي أشوف البنت مو عشانك فرحانة أنتي ووجهك..
سارة:!!!!!!!!!!!!!!!!!!!!!
ناصر:الله يهديك يا يمه غصبتيني على وحده ما أبغاها كنه إلا غصب أتزوج هالزفت..
سارة:ناصر وش اللي قلبك فجأة من شوي شحليلك..!!!
ناصر:لأن اللي قاعد أقوله مو من قلبي لاني ماأحبك ولا أواطن شوفتك..
سارة:وش قلت علشان تحمق وتهاوش..؟؟
ناصر:الحمد لله أني قايل لأمي بعد ماتولدين ورقتك تاصلك لأني مااااااااأحبك ولا أعجبتيني..
سارة:طيب ما راح تجامل إلين أطلع من المستشفى أنا الحين محتاجتك حيييييل وتقول بأطلقك "تبكي"
ناصر: لأني رحمتك يوم أنك حامل و يوم ولدتي مانيب مجبور أخليك عندي تحملت علشان أمي والحين خلااااااااااااااص ماعاد أقدر اتحملك...
سارة:طيب ليش جاي,,جاي تحرق قلبي؟؟!!
ناصر: مو قلبك بس حتى أهلك أسمعي تراك طالق بالثلاث...
سارة:أطلع يا...........الله لا يسامحك الله لا يسامحك "تبكي"
ناصر:على فكرة ما جيتك حب فيك ولا حتى بالبنيه بس جاي علشان أقولك انتي طالق...
سارة:أطلع جاي تناقض نفسك الله لا يسامحك...
*********************************
بعد يومين تسلمت سارة ورقت طلاقها,فبكت بحرقه لأجل أبنتها فقط لأنها ما كانت تحبة بالمرة وهو يكرها مووووووت وأرسل ورقه يقول فيها(ترى البنت أسمها $فرح$..
(( طبعا سبب الطلاق إن ناصر ما يحب سارة ويكرهها لكن مو سبب مقنع يطلقها وأقدر أقول ما فيه سبب محدد بس زي ما يقولون سارة ما قصرت عليه بشيء لكن ما اعجبته وعشان كذا طلقها )) ..
ومرت الأيام والبنت عند أمها وصار عمرها 7سنوات...
وفي يوم الاربعاء كانت*فروحه*تناضر التلفزيون وكان فيه الفلم المحبب لها بالمرة*توم و جيري*دق الجرس مالقت له بال،شوي ودخل خالها محمد..
محمد: أهلين فروحه..
فرح: خالي أبغى حلاوة زي اللي مع جيري تكفى وزي اللي معه قبل أمس واللي قبله و...
محمد:*قاطعها*إلا ماتبين البقاله كلها؟؟؟!!يالله روحي لم ماما قولي لها تلبسك بسرررررررررعه..
فرح: توديني ألعب بالحديقة زي أمس؟؟
محمد: لا أعلمك بعدين روحي وبسرعه
فرح: بس ما تروح؟؟؟
محمد: أقول خلصيني........
جلس الخال بالصالة وهو يقول في نفسه(مسكينه يا فرح ما تدرين ليش قلتلك ألبسي الله يرحم براءتك)..
******************************
فرح: خااااااااالي يالله نروح..
محمد: يالله يا فرح أدخلي المجلس
فرح: وليه؟ما راح نروح للحديقه؟؟؟
محمد: ومن قال؟؟؟
فرح: أنت قلت نسيت؟؟
محمد: أدخلي..
ودخلت فرح المجلس وكانت المفاجئه..كان والد فرح ينتظرها..
ناصر: أهلين فرح
فرح: مين أنت؟؟
محمد: فرح يالله سلمي عليه
فرح: لا ماراح اسلم مين هذا؟ماما تقول عيب تسلمين على الرجال عيييييييييييييييييييييييييييب
محمد: هذا أبوك يافرح
ناصر: فرح أنا بابا ناصر عرفتيني؟؟
فرح: لا وش تبي؟؟
محمد: فروحه هذا بابا عيب كذا..
فرح: مابي بابا..ماما تقول بابا سافر بعييييييييييييييييييييييييييييييييد وكيف جاء..
ناصر: ركبت الطيارة وجيت بسرعة علشانك..
جلست فرح عند أبوها..وهي خايفة منه لأنها أول مره تشوفة؟؟
ناصر: محمد ما عليش أختي نوره تبغى تشوف فرح وأختي قريبه في الدمام ما راح نتأخر الدمام عن الخبر حذفة عصى..بنتعشى عندها وبنجي بأذن الله
محمد: بشوف أمها توافق و إلا لا؟؟
وافقت أم فرح بعد ضغط من ناصر لأجل ياخذ بنته........
فرح: يالله خالي بروح للحديقه مع بابا ونرجع ........
محمد: مع السلامه .......
**************************
راحت فرح مع أبوها وجت الساعه 1 بالليل ماجت..خافت أم فرح على بنتها جت أم فرح لأخوها محمد..
سارة: محمد ما تلاحظ تأخروا؟؟
محمد: إلا والله من اليوم أتصل فيه مارد علي ثم طلع الجوال مقفل وأرسلت رساله ولا رد علي؟؟
سارة: أكيد راح لم أخته؟؟حشى والله لو أنه رايح لم مكه كان جاء لايكون صار لهم حادث وإلا شي ياربي بنيتي..
محمد: الله يستر منه ما أرتحت له بس لا يضيق صدرك عليها
**************************
فرح: بابا متى أروح لماما عمه نورة بعيدة خلاص مابغاها!!!
ناصر: تبطين عظم يا دلوعة أمك
فرح: وشو.....
ناصر: أقول نامي شوي وناصل
نامت فرح ثم قامت ثم نامت ثم قامت ما وصلوا
فرح:بابا تعبت من السيارة أبغى أنزل أبروح لم ماما
ناصر: فرح نامي وإلا أسكتي أزعجتيني
فرح: بابا لا تهاوشني!!!!!!!!!!!!
مرت سيارتهم من عند -كوبري- نفس الكوبري اللي عند بيتهم وفرحت وقالت في نفسها((ياحظي وصلت بيتنا))وهي المسكينه ما تدري إن كل الدنيا ملياااااااااااااااااااااااانه**كباري**أي جمع كوبري....
****************************
سارة:محمد تكفى رح أنت وخالد ودوروهم وإلا أطلبوا رقم عمتها وإلا شوفوا حل أخاف على بنيتي من هالوحش اللي مارحمها وهي توها مولوده بيرحمها الحين!!!!
محمد: بس ياسارة خلاص الموضوع بينحل ولا يهمك شي .. بنتك وبترجع لك يمكن تعبوا وقالوا بنام ونروح بكرى..من يدري..
سارة: بس والله ما أرتحت له ولفعايله..
خالد: يا سارونة يا أختي تفاءلي خير..
أم سارة: بس يا عيالي والله ما ينوثق بواحد خدع امها أم 22الكبيره الفاهمه بيرحم هالصغيرة؟؟؟؟
خالد : يمه الله يهديك لا تكبرينها براسك..
أم سارة: شوفوا والله مانيب هيا إن ماصار إحساسي صحيح....
سارة: يمه مو وقته تلعبين بعقلي......
*******************************
وصل ناصر وبنته فرح الى الرياض ...(ديرة ناصر)..
ناصر: فرح يالله أنزلي...
فرح: بابا هذا بيت عمه....
ناصر: لا بيت جده..
فرح: أيش.!!!!
نزلوا من السيارة ودق الجرس وفتح لهم ولد عمتها مشاعل......
ناصر: أهلييييييييين عبد الإله..وش اخبارك
عبد الإله: أهلييييين هلا والله بخالي.....بس هذي مييييييييييييييييييييييييييييييييين؟؟؟؟؟؟؟؟؟
ناصر: أقول يا مصلك إذا تلقفت أقلب وجهك.........
عبد الإله: خال والله إنك مزااااجي توك تسلم وفرحان........
ناصر: أقول تقلع...
عبد الإله: خال ترى عمري18 مو بزر زي مالك و حاتم...
ناصر: أقول شف لي الدرب و انت ساكت......
عبد الإله: خالي هذي مين يا ملحهااااااااااا ...
ناصر: وجع هذا وانا واقف شف لي الدرب .........
عبد الإله: أقول تراها بزر!!
ناصر: عطني ظهرك قبل ما أعطيك كف تنسى الدنيا معاه !!رح شف لي الدرب ..
عبد الإله: شين وقوي عين .. "بصوت واطيء"
ناصر: نعم ؟
عبد الإله : أقول أبشر من عيوني...........
**********************************
في الشرقيه
-------------------------
ما زالت سارة وامها وأخوانها وأختها في حالت إرتباك وتوتر شديد جداً.....لا يدرون ماهو مصير(فروحة الصغيرة)..........
*********************************
في الرياض
--------------------
ناصر : السلام عليكم ورحمه الله......حيا الله الوالده...............
أم ناصر: الله يحييك و يخليك......
ناظرت فرح للي في الصاله اللي يناظرها بنظرات حقد واللي بالرحمه والشفقه..وهي ما تدري وش السالفه.........
أم ناصر: زارتنا البركه يا وليدي وليش جبت فرح عسى ماشر......!!!
ناصر: الله يبارك بعمرك يا يمه بس ريحتكم بصل أخضر لا عاد تاكلونه بالصاله رجاء..
أم ناصر:ياوليدي يقولون زين لفقر الدم ...
هدى: أهلين ناصر حياك الله....هذي فرح؟؟؟
ناصر:أيه ....
فرح: بابا وين ماما؟متى بنروح؟
ناصر: خلاص ماما راحت بعييييييييييد ماراح تجي إلا بعدين ويمكن ما تجي ...
فرح: بابا أبغى ماما.......... "بنبرة حزن"
هدى: فرح روحي لم روان في الحوش ألعبي معها تراها كبرك.....
فرح: ما أبغى،أبغى مامااااااااااااااااااااااااا.........
هدى: شكل بنتك عنيدة وإلا مستحيه...........
أم ناصر: لا والله ضعيفه إلا خايفه ناس أول مره تشوفهم.........
ناصر: يمه رجاءً لا تقولين قدامها ضعيفه وش اللي يخليها ضعيفه.....
هدى: قلتوا لأمها.....؟؟
ناصر: هذا اللي ناقص مابقى إلا أستأذن منها.........
هدى: يعني وشلون.... "متعجبه"
ناصر: أبحرق دمها ودم أمها عليها وأخليها تندم طوووووووووووول عمرها...
هدى: تحرق دم أمها على أيش تحرقه؟
ناصر ما رد وتجاهل كلام هدى..
********************************
في الشرقيه( الخبر)
----------------------
محمد: سارة...ساااارة....يا ساااااااااااااااااارة...
سارة: نعم...
محمد: جهزي شنطتي الله يعافيك وبسررررررررعه.....
سارة: وليش؟؟؟
محمد: للأسف يا سارة بنتك أخذها أبوها لرياض .... ولازم تجهزين شنطتي بأروح أنا وزوج أختي ندى............
سارة: بتروح انت و عبد العزيز....
محمد: ايوه بس لا يهمك بنرجعها غصب عن الكل.........
سارة أنهارت و بكت وجت أمها هيا تواسيها..............
********************************
أما فرح فهي مازالت في حاله إستغراب وخوف لأنها ماتعرف أحد ولا تدري وين أمها.............
ناصر: أسمعي يا هدى أنا بأودي فرح لم زوجتي بس مو اليوم بكره.......أنتبهي لها..
هدى: من صدقك توديها لم زوجتك وعندها عيال مشغوله فيهم..........!!!
ناصر: من كثرهم بنتين و ولد....
هدى: صحيح أن " نهى وغيداء و حاتم"مو مزعجين ولا شريين بس أخاف.....
ناصر: تخافين من أيش ..... أقول هذي 300 روحي وأشتري لفرح كم لبسه حقت أسبوعين ثم نشتري لها بعدين...........
هدى: إن شاء الله...........
*******************************
محمد:شوف يا عبد العزيز الحين إحنا غريبين عن هالديره بننام بالفندق ونريح وروح لهم المغرب لاني الحين مره تعبان.........
عبد العزيز: اللي تشوف يابو مشعل...........
*****************************

حاتم: لا..لااااا..لاااااااااااااااا..
ناصر: عد ياولد "...."
حاتم:لا..لاااااااا..لااااااااااااااااااا..للإسراف بالماء..
ناصر: لا تصرف..
قام حاتم وفتح الباب؛شوي إلا وجاء يركض..
حاتم:بابا فيه أثنين يبغونك وقولون ناده بسرعه..
ناصر: طيب وشلون سيارتهم؟؟
حاتم :كامري زي لون الخيار..
ناصر:محشش أنت يالله لك الحمد00
طلع ناصر للرجال يوم شاف محمد و عبد العزيز صار وجهه أسود..
ناصر:محمد !!هلا والله ومرحبا...
محمد:هلابك ؛وين فرح؟؟
ناصر:وليش وش تبغى فيها؟؟
محمد:والله مدري عنك حارق قلب أمها عليها وتقول وش تبغى فيها؟؟
ناصر:بس يا محمد فرح بنتي ومالكم أي حق تاخذونها..
محمد:إلا لنا حق يا أبو حاتم البنت توها صغيرة وللأمها حق الحضانه..
عبد العزيز:أسمع يابو حاتم حنا جينا ناخذها ما جينا نفتح محضر(س,ج)رجاء أخلص علينا ترى ورانا طريق طويل..
ناصر:خلاص بأدخل أجيبها..ثواني..
محمد:لا،نادها ماتنومن أنت..
ناصر: محد بيسمعني يا بو00
"قاطعه"محمد:لو سمحت ترى ورنا طريق طويل بلا لف ودوران محنا ناقصين عور راس..!!
ناصر:حاتم..حاتم.. حتوم وبصمخ..
حاتم: سم يبه..
ناصر:ناد فرح..
حاتم:طيب بس هي في الحمام..
ناصر:أقصر صوتك قصرالله عمرك..طلعها من الحمام ..
حاتم: بابا وشلون هي مشغوله..
محمد:خلاص مافيه مشكله ننتظرها..
ناصر:أجل بأجيب القهوه..
عبد العزيز:لا شكرا مايحتاج تونا متقهوين..
لحظات ثم جت فرح يوم شافت خالها وزوج خالتها ..بكت من الفرحه وعلى طووووووووووووووووووووووووول ضمت خالها من شدة فرحتها..
فرح:خالي ليش جبتوني هنا أبغى ماما.. "تبكي"
محمد:خلاص يابعد الدنيا الحين نروح لم ماما..
عبد العزيز:يالله يافروحه *ماما وخاله ندى وجده*كلهم يستنونك..

*******************************
ركبت فرح السيارة مع خالها وزوج خالتها عبد العزيز وراحوا للشرقيه..ويوم وصلوا عند الباب أتصل محمد بالجوال على أخته سارة"أم فرح"..
محمد:ألو..
سارة: هلا هاه بشر..
محمد:أبوها رفض إنها تجي معانا والبنت الحين في الرياض عند أبوها..
سارة:لا مو معقوله..محمد صادق..قول أمزح تكفى..قل غير هالكلام..
محمد:لا أمزح يالله أفتحي الباب..
سارة:والله..
محمد: أي والل...ألو سارة ألو
سارة:طوووووووط..طوووووووووط
من الفرحه سكرت سارة الخط وخلت محمد يكلم روحه ..
نزلت فرح و خالها محمد..
محمد:عبد العزيز تفضل ريح ونشرب القهوة سوا..
عبد العزيز:أعتذر والله أنتو اخذوا راحتكم وأنا بروح لأمي وزوجتي في البيت..
محمد:أجل مشكور يابعدي الله يوفقك ويساعدك..
عبد العزيز:ما سوينا شيء حق وواجب..
دخل محمد البيت إلا وسارة جايه طاااااااايرة بتشوف فروحه..
سارة: فرح.. "تبكي"
فرح:ماااااااااااااااما
سارة: فرح..
أستغلت الجده"هيا" الفرصه و عزمت فرح في شاليه لاجل تفرح فروحه الصغيره...

*************************
بعد مدة..جاء وقت إستلام النتائج النهائيه للعام الدراسي الثاني..وفرحت سارة لبنتها لأنها الأولى على فصلها وبهالمناسبه سافرت"ساره وبنتها وأمها وندى وعبد العزيز ومحمد وخالد"للجنوب وجلسوا هناك مايقارب الشهر لأن العطله مره طويله وجو الشرقيه حااااار و يضيق الصدر.....
*************************
بدء العام الدراسي الجديد بأسبوعين كانت فرح (بثاني إبتدائي)جاء وقت عودة فرح من المدرسه لكن ماجت..إنتظرت سارة وتحملت لكن جت الساعه(2 الظهر)وفرح ماجت من المدرسه ولاتدري وينها..أتصلت على أخوها خالد حصلت الجوال مقفل؛أتصلت على محمد تأخر مارد أتصلت مرة ثانيه ورد أخيراً..
سارة:ألو..
محمد:هلا
سارة:محمد ألحق علي فرح ماجت من المدرسه..
محمد:وليش ماجت..
سارة:مأدري تكفى رح شف وين راحت يمكن الباص صار له حادث وإلا شي لانها تأخرت ساعة ونص عن وقتها المعتاد..
محمد:أفااااااااااااااااااا..من جد خلاص بدورها وبأردلك خبر..
سارة:مشكور
محمد:لا شكر على واجب..

************************
محمد:ألو
سارة:هلا..لقيتها..؟؟؟
محمد: لاباص مصدوم ولا شيء،بنت الجيران تو الباص منزلها ..
سارة:طيب ماسألتها شافتها وإلا لا؟؟
محمد:بصراحه...
سارة:محمد يالله قول!!
محمد:تقول أنها ماشفتها إلا في الباص وماعاد شافتها..والمدرسه الآن مقفله..!!!!!
سارة:لا تكون مخطوفه ياااااااااااااااوييييييييييييييييل حظي.. "تبكي"
وبدأت رحله البحث عن فرح من جديد..يوم جاء العصر مازالو يدورون عليها وبلغوا كل أقسام الشرطه..زارتهم زوجة خال سارة"يوسف"..
زوجة الخال"مشاعل":أهلين سارة..
سارة:هلا
مشاعل:ليش ناقلين فرح ناوين تنقلون و ماعلمتونا؟؟وإلا بتردين لناصر..
سارة:وشلون عيدي.. "متعجبه"
مشاعل:سارة ؛اليوم أبوها سحب ملفها من المدرسه وراحت البنت معاه..
سارة:لاااااااااااااااااااااااااااااا مستحيل قولي غير كذا..
مشاعل:والله العظيم..أنتي ماتدرين أن000سارة ؛ سارة..
سارة من شده الصدمه أغمي عليها ولازمت الفراش لمدة أسبوع..
****************************
أما والد فرح "ناصر"سحب ملف فروحه لرياض وأخذها المسكينه بمريولها لرياض علشان تسكن معاهم ..فرح يوم شافت الطريق عرفت أنه بيوديها لزوجته وعياله ..بكت وهاوشها ..وبعد ماراحت فرح عند أبوها دخلها المدرسه الجديده ودرست فيها سنه كامله.."ناصر"من شده نجاسته غير البيت علشان ما يجون خوال فرح وياخذونها منه..كانت كل يوم تسأل أبوها وتقول..
فرح:بابا متى أروح لم ماما..؟؟؟؟؟؟
ناصر:في العطله الطويله..
فرح:بابا إبتسام تطقني دااايم علشاني مرة كسرت كوب..
ناصر:وليش تكسرينه؟؟
فرح:بابا مادريت طاحت من يدي..
كانت فرح تشكي لأبوها ..ومره عرفت إبتسام أن فرح تعلم ناصر إذا طقتها وفي يوم من الأيام..
إبتسام: فرح..فرح
فرح:نعم..
إبتسام:تعالي
فرح:نعم "خايفه"
إبتسام:انت قايله لأبوك أني طاقتك..؟؟
فرح:لا
إبتسام:كذاااااااااااااااابه
وبدت إبتسام تظربها بالعصا وفرح تصارخ من قوة الضرب..جت الشغاله وهي تمسك فرح وتطلعها من الغرفه..بعد أن (وسَمت إبتسام ظهر فرح)...

******************************
بعد فترة طويله حوالي شهر إلا كم يوم جت &أم فرح"سارة"وخالها محمد وخالتها ندى وزوجها عبد العزيز &لرياض .........وكان يوم إربعاء ...

****************************
كانت فرح جالسه تتلبس علشان تروح للمدرسه دخل ابوها عليها..
ناصر:فرح؛اليوم لا تروحين للمدرسه..غابي..
فرح:بابا..ليش؟؟
ناصر:أقول غابي وبدون كلام (عظي)على لسانك ونامي..
فرح:بابا المدرسه تقول لا تغابين عندنا اليوم حفله الحروف..’’ مهرجان الحروف ‘‘
ناصر:يا بنت غاااااااااااااااااااااااااااااااااااااااابي يا خبله إذا قلت شي سويه وأنتي ساكته يالله نامي نومه مابعدها قومه إن شاء الله...
طلع أبوها من الغرفه وجلست على سريرها تبكي لأنها ما تدري وش السبب وضاق خلقها لأن الحفلة بتفوتها..يوم جت الساعه 9 ونص جاء ناصرلمها وقال..
ناصر: فرح يالله قومي وألبسي مريولك ويالله معي.
فرح: نروح للمدرسه..؟؟
ناصر:أقول أخلصي علي بلا مدارس بلا بطيخ..نادي الشغاله$مستي$تلبسك..
*******************************
بعد ساعه راحوا لم مبنى كبييييييير ..فرح قامت تناظره ماتدري وشو هالمبنى..ولا عرفت تقراء من الخوف..دخل ناصر وبنته للمبنى هذا.. ..( تتوقعون وشو المبنى؟؟) تابعوا القصه..
___________________________

إذا شفت فيه تفاعل نزلت الجزء الثاني ...